Psalms 70

Suŋuuŋ to tamtoghon to ipasul Maaron pa iuuli

Mbouŋ to David

Paesiiŋ ila pa ŋgeu to imuuŋ pa mbouŋ tovene: Sawa to tamtoghon tigham watooŋrau ve tighason Maaron pa mata iŋgal di, yes irau timbou mbouŋ tonene

1O Maaron, upas ghou navot pa pataŋani tiou tonene.
Yoova, unum uul ghou rikia lak! ^a

2Yes to tigham lilin ghou ne, ughamun ŋgar todi.
Leso ŋgar todi iwaghamgham, ve mayadi ve tighau tila.
Ve yes to tighita pataŋani tiou tonene ve lolodi poia pani,
yes paam, upamuul di tila toman mayadi.

3Ndiran tonowen tiwamogheran di payou tighaze: “Aa! Pataŋani to taghaze ivot pani, tauto ivot wa!”
Tovenen utatan di, ve ugham di mayadi ve tighau tila.
4Eemoghon tamtoghon tisob to tizuaria di payom,
yes pale tinidi iza ve lolodi poia payom.
Yes to lolodi pa ulaaŋ tiom kat,
nene pale moghon moghon tisavsaav tighaze: “Maaron, ye iza tiina kat!”
5Yoova, pataŋani tonene itatan ghou le tapirig isob kat. Narau mbeb eta muul maau.
Ve yom moghon to Ulaaŋa tiou. You naghur matag payom pa upas ghou navot pa pataŋani tonene.
Tovenen uzuar malep. Rikia unum uul ghou!